بسم الله المنان
بما أن أمس كان يوم خميس واليوم جمعه وباجر سبت..
فكانت أمس "طلعة الأهل" ..
فمن يوم الاربعا"اول أمس" قلت حق أهلي نحجز فلم "THE DARK KNIGHT"
لان ما اتوقع نحصل حجز بنفس اليوم.. وعزمت نحجز Vip حيث الكرسي الجلدي الوثير بس للاسف يعني كان مافي اله الساعه اربع العصر والساعه 12 ونص بالليل !
فهواية تأثرت وقلنا يالله ما صارت هالمره انشالله اليايه وحجزنا الساعة ١١:١٥ سينما الافنيوز "الي يعجبني فيها الكراسي الي قبال مال النفيش يحطون فوقك ليتات هاديه الوانها تتغير كل شوي والكراسي تنسحب"
عموما الساعه 8 وربع طلعنا وكنا بالخالديه ما وصلنا الا عالتسع "عقب ما ضيعت كالعاده"وعلما دورنا مصافط "على فكرة الي يبي مصافط بايام الويك اند يروح المصافط الي من ورا الافنيوز ويصعد فوق ليه اخر دور وانشالله يحصل عاد"
معلومة:مجمع الافنيوز يحتوي على قرابة6000 مصفط"بس بالكويت كل نفر ياي بسياره !"
لين وصلنا رحنا مطعم كان رفيجي "بوأكبر" مادحلي اياه"مطعمAL FORNO" يصير بالدور الارضي يم دبنهامز هالمطعم ايطالي قلبا وقالبا والي يتميز فيه ستيك اللحم وبيتزا مارجريتا..فانا طلبت مارجريتا واختي طلبت الستيك وفي شوربة الفطر هم يمدحونها..وييبولك قبلها زيتون مطحون داخل زيت زيتون وبسكوت وشوية توست..
وصل الاكل.. وكان هالحديث
أنا: اقول لو سمحت ما في سوس ينحط عالبيتزا؟
القرسون:"بلكنته اللبنانية"شوف أخي هالبيتزا ضعيفه كتير وما بتتحمل السوس هلأ ازا بدك ممكن انت تحطلها لان كتير من الناس يعجبهم السوس الي بيعطيها نكهة لزيزه وهي اصلا كانت عجينه عاديه بس احنا بنتميز بالمارجريتا يعني تخيل عجينه عادية ونعمل فيها ....إلخ
أنا: عيل ييبلي كاتشب !
عموما الوجبة كانت شهيه وذكرتني بالبيتزا مالت مطعم pizzeria الي بمجمع"Harrods" الي بلندن "والي شعار نظارات حسن نفس شعاره!
بس الفرق بيتزت هارودز ب60 باوند"30 دينار الفاتورة كانت حق نفرين" وهني 5 دنانير البيتزا على بعضها"حق نفر"..
عموما..
خلصنا العشا عالعشر وبقا ساعه وربع عالفلم !
فسويت حق اختي لغز خفيف بعد ما ثقلت بالعشا..
" ولازم ترسم الشكل من غير ما تشيل ايدك ولا ترد هالخط"
بعدها رحنا the chocolate bar تقريبا اكبر فرع لهم شفته للحين ويصير قبال مطعم نينو بالافنيوز..
ليه 11 وخمس دشينا الفلم وكانت القاعه شبه فاضيه " اتذكر بكندا كان طق عالبوابة لان هناك مافي تذكرة تحجز مقعد هناك بس تدش ومن سبق لبق"
بس الفلم كان حده قوي بالنسبة لي اقوى من كل الاجزاء..
ويقولون الممثل صاحب دور الجوكر مات بعد ما اخذ دوا فيه حساسيه منه ! وهالشي صار بس خلصو التصوير وقبل المؤثرات الصوتية ما ادري "جسوم" قام يدز علي ولا من صجه لاني شفت صورة الممثل واهوه يحتقل عقب الفلم !
الشاهد من هالبوست..
متى اخر مره طالع "طلعة أهل" ومتى اخر مره دقو عليك ربعك يوم خميس ولا يمعه وقلت"لا والله ما اقدر اليوم طلعة أهلي !!"
ــــــ
انا ما اقول الا نفس الي قاله بوسعود"خوفي كبير وقلقي اكبر لا باجر يدخلون البعير من خرم الابره"
تحياتي للرضوان
